مقال ساخر”حمّة مش مسامح” بقلم محمد أمين العقربي (ريكوبا)

في يوم من أيام جويلية من أيام 2013 جمع حمة بكاتيته الشيوعيون و توجه بهم نحو خصة باردو و هناك إلتقى بالباجي الذي جمع هو أيضا بجابيجه و ذهب إلى نفس المكان ، نصبو الخيم ، عملو إستراد مشترك ، كلاو مع بعضهم روز بالفاكية ، تكيفو مع بعضهم الميريت و إجتمعت الشيوعية مع الإمبريالية و خرجوا صحن شكشوكة بالشامية ، مانطولش عليكم الحديث و بعد ما صرف القروي مليارات و صرف رجال الأعمال متاع التجمع مليارات روز ماشي روز جاي و الفروي دو مار على عجلة أعرف بدات وجوههم تتنفخ بالعز و الدز … إمشي يا زمان و إيجا يا زمان طاحت الحكومة و جاء المهدي جمعة و عمل شاطح باطح و صفقات متاع بيع و شراء على عجلة وسط سكوت البكاتيت و البجابيج ، قربت الإنتخابات وخينا حمة في الدور الأول يعمل صفة حملة إنتخابية بلوريتارية مانحكيلكش بلوريتاريا و طبقة كادحة أصل و حمة ولد الشعب قريب باش يخرجلنا مالفريجيدار و إلا مالقلص تصاورو عباو les panneaux publicitaire متاع تونس الكل ، يا خساررة الحملة حمة ولد الشعب خرج مالدور الأول ، و قعد في الدور الثاني المرزوقي اليساري الإجتماعي و الباجي قائد السبسي الدستوري التجمعي بالطبيعة حمة يشوف بالروز و الفاكية و صديقو المرزوقي ردو خوانجي و قالك هو جزء مالترويكا و جمع بكاتيتو و تفاهمو باش “يقطعو الطريق على المرزوقي ” ربح بابا عزيزي في التشريعية و الرئاسية و مانجم يشكل الحكومة كان مع النهضة باش يضمن الإستقرار و كذا و مصلحة البلاد فوق كل إعتبار و برشة كلام مزيان متاع قرارم متاع سياسة ، بالطبيعة بابا عزيزي يلزمو يرد الجميل للناس اللي مولتو و مولت نداء تونس و مولت صعودو للسلطة و خرج قال بقانون المصالحة ، حمة الهمامي و البكاتيت فجأة ضميرهم فاق و قامو الجمعة اللي فاتت و قالك ‫#‏مانيش_مسامح‬ :'( اي اي مانيش مسامح اللي وكلني الروز بالفاكية ، مانيش مسامح اللي صرف على إعتصام الرحيل اللي شاركت فيه ، مانيش مسامح اللي مول حملة اللي شاركت معاه في إعتصام الرحيل . مانيش مسامحهم خاطرهم ” كخة كخة ”
أحمة وخي علاش ماتيبجهاش رجلة و تقولها إنتي ماكش مسامحهم موش على خاطر مارجعوش فلوس الشعب و هربو بالمليارات و كذا إنتي ماكش مسامحهم خاطر ما طيحوش النهضة 😀 😀 😀 سامحهم يا حمة و ماتنساش الروز و الفاكية اللي كليتوهم بفلوسهم مانحبش يقولو عليك نكار عشرة و إنتي معؤروف النصير الأول للفقراء و المساكين و المحتاجين و للبجابيج كي يستحقوك <3
و سمعني سلام ” فاتك القطار أه يا حمة ”
‫#‏ريكوبيات‬

أترك تعليق

تعليقات

عن مدونات الصدى