في بلد التوافق لم تعد للمساجد حرمة

المكان : بئر مشارقة
الزمان : بعد صلاة العشاء
الإطار : درس حول ليلة الإسراء و المعراج
إمام جمعة تكلفو وزارة الشؤون الدينية الموقرة باش يعمل درس على ليلة الإسراء و المعراج ( حاجة هايلة كانت مفقودة في عهد بن علي اللي الأئمة وقتها كانو يعملو في دروس على طاعة ولي الأمر و لإعتبار الفقر اللي ضاربهم قضاء و قدر و يلزم الصبر لأن الصبر مفتاح الفرج و نموت نموت و يحيا ولي الأمر ) عاد بدى الدرس و الحلقة كبيرة بما أنو الشيخ معروف في المنطقة بدماثة أخلاقو و بفهمو الصحيح للقرآن و السنة و شيخ على المذهب الزيتوني ( موش مذهب زواتنة بورقيبة و بن علي حاشاه أما على مذهب زواتنة مشائخ آل بن عاشور و سيدي عبد الرحمان خليف ) هاني قلتلكم مذهب زيتوني باش ماتبداوش تكذبو بعديكة و تعملو في أفلام بنت البوعزيزي متاع الشروق …
عاد مانطولش عليكم في نص الدرس يدخل وحيد سكران قنطرة يعربد في وسط الجامع و عمل سيدك بن سيدك شاطح باطح و بدى يسب في الشيخ بالكلام الزايد و إنتي ظلمتني إنتي مانعرفش شنية و فسدت الحلقة و فسد الدرس و تفرتت الجموع بعد ما خرجو السكران من باحة المسجد و في الحالة هاذي الشيخ و كأي مواطن تونسي يتعرض للإعتداء اللفظي مشى يشكي لمركز الشرطة بما أنو السكران لا يزي تهجم عليه بكلام غالط لا يزي دخل لبيت ربي سكران و هذا أمر لا يليق بدولة الفصل الأولاني متاع الدستور متاعها فيه الإسلام دينها …
تسمعو بيه طنّاش ( أسيدك هذا طنّاش واحد فات درجة ماعلابالو ببرشة ) سيدك بن سيدك مركز الشرطة عمل طنّاش² و مولى الدار موش هوني و مايكلفش روحو حتى باش يحقق في الحادثة حاجة طبيعية مادام الشاكي شيخ و إمام جمعة و المكان المعتدى عليه بيت ربي موش دار كمال اللطيف و إلا سانية شفيق جراية و إلا فيلا الحبيب عمار لا و الشيخ قال بالك البارح مشيتلهم في الليل و عندهم حاجة ما أهم عاود مشالهم الصباح كيفكيف عم طنّاش جاب معاه قبيلة الطنانشة و قالولو بالحرف الواحد ” شتحبنا نعملولو ” 😂
مجرد سؤال تبادر إلى ذهني بعد ماسمعت هالحكاية : تخيلو شنية كان باش يصير لو كان في بلاصة السكران هذاكة اللي دخل يسب في بيت ربي و قلب الدنيا و سب الشيخ و ماخلى ما قال فيه جاء في بلاصتو سلفون صغرون دخل باش يصلي الشفع و الوتر و ماعجبتوش الحلقة و تحل الننقاش تحفون مع الشيخ الزيتوني

حول الإحتفال بليلة الإسراء و المعراج هل هو بدعة أم لا و واحد صبايحي يهزها باردة و سخونة للمركز ❤
باهي خلينا مالسلفون تصورو شيخ لابس جبة و شاشية و دخل لبار و بدى يسب فيهم على بعضهم 😂😂😂😂😂
مجرد أنني نخمم في هالزوز حكايات يشدني كريز متاع ضحك رغم اللي الحكاية يلزمنا نعملو مندبة جماعية على حال تونس اللي الإسلام دينها و الجمهورية نظامها 😢 😢

أترك تعليق

تعليقات

عن مدونات الصدى