عماد الدغيج: ثوروا فلن تخسروا سوى القيد و الألم

ايا سيدي تحياتي على ما ياتي ، و تحية خاصة للسيد وكيل الجمهورية اقوى فان و اقوى متابع لما يكتبه ابناء الثورة .
باهي يا جماعة ، ياخي علاش خرجنا ضد بن علي ؟ اشنوة مشكلتنا مع بن ؟؟ اشبيهم الطرابلسية ؟؟ اشبينا ما خفناش مالكرطوش ايام الثورة ؟؟ موش كنا نعتقدوا مستعدين باش نموتوا كي نتخلص من فساد و جرائم بن علي ؟؟
يا سيدي خرجنا و محسبناش مع الموت و الحبس فقط لان البلاد نخرها الفساد ، خرجنا ضد البطالة ، ضد حكم العايلة و النفوذ اللي تتمتع بيه ، خرجنا ضد الظلم و القمع ، ضد الفقر و التهميش و الحقرة …
اليوم عنا ما يقارب 6 سنوات على هروب بن علي ؟؟ وين وصلت البلاد ؟؟؟؟؟؟؟؟
الفساد ؟؟؟ ازداد بنسبة 500 بالمائة و اصبح في كل القطاعات و المجالات
البطالة ؟؟ كانو 600 الف بطال اصبحو ما يناهز لمليون بطال
الفقر ؟؟ ما نحكيش خير و نزيدوهم الغلاء و الاسعار اللي شعلت نار
الظلم ؟؟ اصبح عيني عينك و كل مرة نسمعوا باعتداء على مواطن و الزج به في السجن
التهميش و الحقرة ؟؟ هاذم يحكولكم عليهم الولايات الداخخلية و الاحياء الشعبية في العاصمة و غيرها
الطرابلسية ؟؟؟ كانو يسرقوا وحدهم و مانعين غيرهم مالسرقة ، اليوم السرقة جهار في النهار و البدليل و البرهان و تعملي عملة
اليوم حكم العايلة اتغير بحكم العصاابات و المافيات ، حكم كمال اللطيف و شفيق جراية و غيرهم اللي يتحركوا في الضل …
اليوم الرشوة عيناني و الاكتاف و المعارف هي اللي تقضي
اليوم البلاد كلاها الوسخ في كل زنقة و كل نهج و كل مدينة
اذا علاش نقول في الكلام هذا ؟؟
نتحسروا على ايام بن علي ؟؟
ابدا ،
ندمنا على ثورتنا ؟؟
مستحيل
نقول في الكلام هذا لاني باهت في الشعب وين اتخبى ؟؟؟
وينهم الاحرار و الشرفاء اللي ثاروا ضد الدولة النوفمبرية ؟؟
وينهم اللي رفعوا شعار اوفياء لدماء الشهداء ؟؟
وينهم اللي نادوا باسقاط دولة الفساد ؟؟
وينهم اللي قالوا الشعب فدّ فدّ مالطرابلسية الجدد ؟؟
وينك يا مغبون ؟؟ وينك يا زوالي يالي خلوك اتعاني ؟؟
وينك يا بو العايلة يالي تجري ما تلحق ؟؟
سكتوكم الاحزاب ؟؟
رضيتوا بالتنافق ؟؟ عفو التوافق
لموا رواحهم الكل في حكومة زعمة حكومة وحدة !!! وحدة ضد اشكون ؟؟
تي اتوحدوا ضدكم ايها الشعب
اتوحدوا ضد المطالب متاعك و تعاهدوا على حماية الفساد
يقولونا قانون المصالحة !!!! تي اتصالحوا و كملوا و اتشاركوا في الحكم و النفوذ …
اما انت يا مواطن ، فسيتركوك تموت
باش يخلوك اتموت بغبنتك … بقهرتك … بحسرتك … بغصتك
تقبل با اتموت ذليل ؟؟
تقبل باش اتموت مهزوم ؟؟ مسلوب الكرامة ؟؟ تقبل باش تلحقك لعنة الاجيال القادمة ؟؟؟
الساكت عن الحق شيطان اخرس
و انت شيطان يا من قبلت بالظلم و الفساد و الحقرة
ثوروا ، انتفظوا ، قاوموا ، فهم اجبن من ان يصمدوا امامكم
ثوروا فلن تخسروا سوي القيد و الالم
توكلوا على ربي ، و ربي ما يخيّب زوالي مقهور .
الرخ لا
الرخ لا حتى و ان شوهونا … حتى و ان سجنونا … حتى و ان عزلونا … حتى و ان لفقوا لنا التهم و القضايا … حتى و ان تحالفوا باعلامهم و مالهم و عملائهم ضدنا، حتى و ان سخّروا اجهزة الدولة من امن و اعلام و قضاء ضدنا ، فنحن لا و لن نستسلم و سننتصر باذن الله .
طبعا كل ذلك في اطار القانون و السلمية سيدي وكيل الجمهورية .
عماد الدغيج

أترك تعليق

تعليقات

عن مدونات الصدى